
香巴噶舉教言集NG4འཇམ་དབྱངས་མཁྱེན་བརྩེའི་དབང་ཕྱུག་གི་ཚར་ཆེན་གྱི་གསུང་ལ་ཟིན་བྲིས་ནི་གུའི་ཕྱག་ལེན་བཞུགས་སོ།།
1-25
༄༅། །འཇམ་དབྱངས་མཁྱེན་བརྩེའི་དབང་ཕྱུག་གི་ཚར་ཆེན་གྱི་གསུང་ལ་ཟིན་བྲིས་ནི་གུའི་ཕྱག་ལེན་བཞུགས་སོ།།
༄། །སྔོན་འགྲོ།
༄༅། །འཇམ་དབྱངས་མཁྱེན་བརྩེའི་དབང་ཕྱུག་གི་ཚར་ཆེན་གྱི་གསུང་ལ་ཟིན་བྲིས་ནི་གུའི་ཕྱག་ལེན་བཞུགས་སོ།། ནི་གུའི་སྒྱུ་ལུས་དབང་མོ་ཆེའི་ཚེ་དཀྱིལ་འཁོར་སྦྲེང་ཚར་རེ་རེའི་མདུན་དུ་ཟླུམ་གཏོར་རེ།
ལྷ་བཤོས་རེ། མགོན་པོའི་མཎྜལ་གྱི་ཁར་གཏོར་མ་གྲུ་སུམ་མདའ་དར་ཅན། མདུན་དུ་མཆོད་པ་སྦྲེང་ཚར་དབང་གི་སྔོན་དུ། བགེགས་གཏོར་དྲག་རོལ། སྔོན་འགྲོ་རྣམས་ཆོས་རྗེ་སྟོན་པའི་ཡི་གེ་བཞིན་ཡེ་
ཤེས་དབབ་པའི་ཚེ། སློབ་མ་བདེ་མཆོག་ལྷན་སྐྱེས་འབྱུང་བཞིའི་དཀྱིལ་འཁོར་སོགས་ཀྱེ་རྡོར་བཞིན། བུམ་དབང་ལ་དབང་དང་བུམ་ཆུ་བྱིན། གསང་དབང་ལ་ཐོད་ཆང་བྱིན། གོང་མ་གཉིས་ལ་ཀུ་ཤས་ཡུལ་ཙམ་
མཛད། དབང་མན་ངག་དང་འབྲེལ་བའི་ཐོག་མར་མཎྜལ་ཚོམ་བུ་བདུན་པ་ལན་གསུམ། ཡི་གེ་ལྔ་འོད་དུ་ཞུ་བའི་ཐིག་ལེ་ལྟེ་བར་ལྔ་ཚོམས་སུ་འགོད། རེ་རེ་ལ་ཌཱ་དྲིལ་དང་ཧྲཱི་ཧ་ཧ་
བླ་མ་བརྒྱུད་པའི་བྱིན་རླབས་བརྗོད། རྩས་ལམ་སྦྱངས་པའི་ཚེ། ཡི་གེའི་འོད་ཀྱི་འཁོར་ལོ་དེ་དང་དེ་གང་བས། རྩའི་མདུད་པ་ཐམས་ཅད་སྦྲུལ་མདུད་ལྟར་རང་གྲོལ་དུ་གྱུར། མཐར་ལུས་ཀྱི་རྩ་མདུད་
ཐམས་ཅད་གྲོལ་བར་སྒོམ། གདམས་ངག་དབང་དང་འབྲེལ་བའི་དབུ་མའི་ཡར་སྣར་ཧཾ་གི་རྩེར་ཐིག་ལེ་དཀར་པོ་ཡུངས་འབྲུ་ཙམ། གསང་གནས་སུ་ཧཱུྃ་སྔོན་པོ་མགོ་གྱེན་བསྟན་གྱི་རྩེར་ཐིག་ལེ་དམར་པོ་ཡུངས་འབྲུ་ཙམ། 
1-26
ཧཱུྃ་གྱེན་དུ་བྱོན། དབུ་མ་སྒྱུ་མ་ཟློག་པ་ལྟར་ཐིམ་ནས་སྙིང་ཁར་སླེབ་ཧཱུྃ་ཐིག་ལེ་ལ་ཐིམ། ཧཾ་མར་བྱོན། དབུ་མ་སྒྱུ་མ་ཟློག་པ་ལྟར་ཐིམ་ནས་སྙིང་ཁར་སླེབ་ཧཾ་ཐིག་ལེ་ལ་
ཐིམ། ཐིག་ལེ་དཀར་པོའི་རྗེས་སུ་དམར་པོས་དེད་པར་བསམ་པ་སོགས་འདྲ། མཐར་དེ་ལྟར་དབང་ཐོབ་པས་བདག་བརྒྱུད་དམ་ཚིག་དང་ལྡན་པ་ལ་དགྱེས་པའི་ཚུལ་དུ་མདུན་གྱི་མཎྜལ་སིལ་བ་ཚལ་དུ་
གསལ་བ་ནས་མགོན་པོ་མདུན་གྱི་ནམ་མཁའ་ལ་འུར་ཆེམ་གྱིས་བྱོན། ཁྱོད་ཀྱི་བར་ཆད་ངེས་སེལ། འཕྲིན་ལས་ངེས་བསྒྲུབ་ཅེས་གསུང་ལྷང་ལྷང་བཞུགས་པའི་ཐུགས་ཁ་ནས་ཧཱུྃ་མེ་འབར་བ་རེ་ནར་གྱིས་
ཆད། རང་གི་སྤྱི་བོ་ནས་ཞུགས། སྙིང་ཁར་ལམ་གྱིས་ཞུགས་པས་བར་ཆད་ཐམས་ཅད་བསྲུངས་བར་བསམ་ལ། གཏོར་མ་མགོ་བོར་བཞག་ཅིང་། ཨོཾ་བཛྲ་མཧཱ་ཀཱ་ལ་སོགས་ཀྱི་མཐར་ཛཿཧཱུྃ་བཾ་ཧོ་བརྗོད། དེ་
ཉིན་འདི་ཀའི་ཁྲིད་ཀྱི་གོ་བཅད་ནའང་ཡོང་ངོ་། །དེ་ནས་སོགས་འདྲ། གཏུམ་མོ་བདེ་ཆེན་གྱི་དབང་ལ། ཡིག་བརྒྱ་གསོལ་འདེབས་གྲུབ་ནས། སརྦ་བིགྷ་ན་ན་མ། སརྦ་སོགས་གསུམ་གྱི་མཐར་བདེན་པ་བརྡར་
ཏེ་དྲག་རོལ་དང་བཅས་པས་བགེགས་གཏོར་ཕྱིར་དོར། དགའ་ཆེན་ཁྱེད་བདག་གིས་གསོལ་བ་གདབ། བུ་ཚུར་ཤོག་གི་གནང་བ་བྱིན། རྟོག་པ་བསྡུ་བ། དཀོན་མཆོག་གསུམ་ལ་སོགས་ཀྱི་རྒྱུན་གཤེགས། བདེ་སྟོང་དུ་སེམས་བསྐྱེད། 
1-27
མདུན་གྱི་མཎྜལ་ཡེ་ཤེས་ཀྱི་སྣང་བ་ལས་གྲུབ་པའི་བསྲུང་འཁོར་གྱི་ནང་། གཞལ་ཡས་ཁང་ཕྱི་མཆོད་རྟེན་མགོ་ལྔ་པ་ལ་ནང་རྒྱལ་ཁབ་ཀྱི་གནམ་སའི་དབུས་སུ་སེང་ཁྲི་ལ་བླ་མ་དང་ངོ་
བོ་གཅིག་ལ་རྣམ་པ་ཐ་དད་པའི་བདེ་མཆོག་ལྷ་ལྔ་མངོན་རྟོགས་བཞིན་གསལ་བཏབ། སློབ་དཔོན་དང་མདུན་བསྐྱེད་ཀྱི་ཐུགས་ཁའི་འོད་ཀྱི་སྦྱངས་པའི་སློབ་མ་བདེ་མཆོག་ལྷན་སྐྱེས་སུ་རྒྱས་པར་བསྐྱེད་པའི་
དཔྲལ་བར་ཨོཾ་སོགས། ཕྱོགས་བཅུའི་སངས་རྒྱས་ཐམས་ཅད་བདེ་མཆོག་ལྷ་ལྔའི་རྣམ་པར་བསྟིམ་ཞིང་ཧྲཱིཿ ཧ་ཧ་དང་རོལ་ཆེན། དབང་དངོས་གཞི་ལ། སློབ་དཔོན་གྱི་ཐུགས་ཁའི་འོད་ཀྱིས་མདུན་བསྐྱེད་ཀྱི་དཀྱིལ་འཁོར་
སློབ་མའི་སྤྱི་བོའི་ཐད་ཙམ་མདུན་གྱི་ནམ་མཁར་སྤྱན་དྲངས། དབང་རེ་རེ་ལ་ཌཱ་དྲིལ་དང་ཡི་གེ་བདུན་པའི་མཐར། རྩ་བརྒྱུད་ཀྱི་བླ་མ་རྣམས་ཀྱིས་ད་ལྟ་ཉིད་དུ་སོགས་བརྗོད། དེ་ནས་སོགས་
འདྲེའོ། ཉིན་བར་གྱིས་འཁྲུལ་པ་བཟློག་པ་སྒྱུ་ལུས་ཀྱི་དབང་ལ། སྔོན་འགྲོ་རྣམས་འདྲ། མདུན་བསྐྱེད་གཞལ་ཡས་ཁང་གི་དབུས་པདྨ་འདབ་བརྒྱད་ཀྱི་ལྟེ་བར་སེང་ཁྲི་པད་ཉི་ཚངས་པ་བརྒྱ་བྱིན་གྱི་སྟེང་
དུ་ཀྱེ་རྡོར་ཕྱག་གཉིས་པ་ཡབ་ཡུམ། འདབ་མ་བརྒྱད་ལ་གཽ་རཱི་སོགས་ལྷ་མོ་བརྒྱད་མཚན་ཙམ་གསལ་བཏབ། སློབ་མ་ཀྱེ་རྡོར་དུ་བསྐྱེད་ཡེ་ཤེས་དབབ་པ་འདྲ། དངོས་གཞི། སློབ་མ་ཀྱེ་རྡོར་དུ་གསལ་བའི་ལུས་ཀྱི་དབུས་དྲང་པོར་དབུ་མ་དཀར་གསལ་ཡར་རྩེ་ཚངས་བུག་ཏུ་ཁ་ཤག་གི་བྱེ་བ་གསལ་བཏབ། 
1-28
མ་སྣར་རམ། སློབ་དཔོན་གྱི་ཐུགས་ཁའི་འོད་ཀྱི་མདུན་གྱི་ཀྱེ་རྡོ་རྗེ་སྤྱི་བོར་སྤྱན་དྲངས། དབང་དངོས་རེ་རེ་ལ་ཌཱ་དྲིལ་དང་། དེ་ཝ་པི་ཙུ་བླ་མ་བརྒྱུད་པའི་བྱིན་རླབས། དེ་ནས་སོགས་
འདྲ། མཚན་མོའི་འཁྲུལ་པ་བཟློག་པ་རྨི་ལམ་གྱི་དབང་ལ་སྔོན་འགྲོ་འདྲ། མདུན་དུ་རྒྱུད་སྡེ་ལྔ་གཙོ་སྤྲུལ་གསལ་གདབ། འདི་ལ་བསྐྱེད་རིམ་གྱི་དབང་བཞི་དང་། རྫོགས་རིམ་ཞུ་བདེའི་དབང་བཞིའི་དབང་ཡོད་
པས་ཡིག་རྙིང་རང་ལ་གཙོ་བོར་རྟེན་དགོས། སློབ་མ་བདེ་མཆོག་དུ་བསྐྱེད། ཡེ་ཤེས་དབབ། དངོས་གཞི་དཔོན་སློབ་གཉིས་ཀའི་ལུས་ལ་རྩ་གསུམ་འཁོར་ལོ་ལྔའི་ལྟེ་བར། ཧཱུྃ་ཧྲཱི་ཧཱུྃ་མཾ་བཀོད། སློབ་དཔོན་
གྱི་ཡིག་འབྲུ་ལྷར་གསལ་བ་ལས་འོད་འཕྲོས་སློབ་མའི་ཡི་གེ་ལྔ་ལྷར་བསྐྱེད་དེ། ལྟེ་བར་འཇམ་རྡོར་ལྷ་བཅུ་དགུ་མཚན་ཙམ་གྱི་གསལ་གདབ། ལྷ་སོ་སོའི་ཁ་དོག་དང་མཐུན་པའི་འོད་ཀྱིས་འཁོར་
ལོ་སོ་སོ་ཁེངས་པར་བསམ་ཞིང་། ཌཱ་དྲིལ་དང་སོ་སོའི་སྔགས། ཞུ་བདེའི་དབང་གི་རྗེས་སུ། རྨི་ལམ་གྱི་ཁྱད་པར་གྱི་བྱིན་རླབས་རང་བདེ་མཆོག་དུ་གསལ་བའི་སྨིན་མཚམས་སུ་ཐིག་ལེ་དཀར་པོ་
སྲན་མ་ཙམ་གྱི་ནང་དུ་ཡི་གེ་བདུན་པ་ཁ་དོག་སྔོན་པོ་འོད་ཀྱི་རང་བཞིན་འཁྲུག་འཁྲུག་པ་ལ་སེམས་གཏད་རྨི་ལམ་གྱི་དྲན་འདུན་གཏོང་དུ་བཞུགས། རྗེས་འདྲའོ། །འོད་གསལ་གྱི་དབང་ལ། མདུན་བསྐྱེད་བདེ་མཆོག་ལྷ་ལྔ་གསལ་བཏབ། 
1-29
སློབ་མ་བདེ་མཆོག་ཏུ་བསྐྱེད་ལ་ཡེ་ཤེས་ཕབ། དབང་དངོས་རེ་རེ་ལ་ཌཱ་དྲིལ་དང་ཡི་གེ་བདུན་པ། རྗེས་འདྲའོ། །འཕོ་བའི་དབང་ལ། མདུན་བསྐྱེད་གཞལ་ཡས་ཁང་གི་ནང་དུ་ཆོས་འབྱུང་གྲུ་སུམ་
ཉིས་རྩེགས་ཀྱི་ནང་དུ་རྡོ་རྗེ་རྣལ་འབྱོར་མ་བསྐྱེད། སློབ་མ་སེང་ཁྲིའི་སྟེང་དུ་བདེ་མཆོག་དུ་བསྐྱེད། ཡེ་ཤེས་དབབ།
༄། །དངོས་གཞི།
དངོས་གཞི་ལ། མཁའ་སྤྱོད་མ་མར་མེ་གཉིས་ཆད་ཀྱི་ཚུལ་དུ་མདུན་གྱི་ནམ་
མཁར་སྤྱན་དྲངས། དབང་བཞི་ལ་ཌཱ་དྲིལ་དང་ཨོཾ་གསུམ་མ། འཕོ་བའི་ཁྱད་པར་གྱི་བྱིན་རླབས་ལ། མདུན་གྱི་རྣལ་འབྱོར་མ་བྱོན། སློབ་མ་བདེ་མཆོག་ཏུ་གསལ་བའི་དཔུང་པ་གཉིས་ཀྱི་སྟེང་དུ་ཞབས་
བཞག གསང་གནས་པད་མ་དམར་པོ་ཁ་ཕྱེ་བ་ལྟ་བུ་ཚངས་བུག་དང་སྤྲད་པའི་རྣམ་པར་གསལ་བཏབ། ལྟེ་བར་རང་སེམས་ཨ་དཀར་པོ་འཕུར་ལ་ཁད་པ་རྒོད་ཀྱི་ཐེ་ཐུང་ལྟ་བུ་རང་རླུང་
གིས་ཡོམ་ཡོམ་སྐྱོད་བཞིན་པ་དེས་གྱེན་དུ་ལྟས་པས་ཚངས་བུག་སྐྱ་ཧ་རེ་བ་དེ་ནས་རྡོ་རྗེ་རྣལ་འབྱོར་མའི་གསང་གནས་མཐོང་། དེར་འགྲོ་བའི་འདུན་པ་དྲག་པོས། རྗེ་བཙུན་རྡོ་རྗེ་རྣལ་འབྱོར་
མས་བདག་དག་པ་མཁའ་སྤྱོད་ཀྱི་གནས་སུ་འཁྲིད་དུ་གསོལ། ལན་གསུམ། ཐུགས་ཁ་ནས་འོད་ཟེར་དཀར་པོ་བ་ཐག་བརྐྱང་པ་ལྟ་བུ་ནར་གྱིས་བྱོན། སྤྱི་བོ་ནས་ཞུགས། ལྟེ་བའི་ཨ་ལ་རེག་པས་ཁབ་ལེན་ལ་ལྕགས་འཇུ་བ་ལྟར་འཐེན་ནས། 
1-30
ལུས་ཀྱི་དབུས་ན་ཡར་ཡེ་རེ་རེ་སོང་། ཚངས་བུག་ནས་དོན། བྷ་ག་ནས་ཞུགས་ཐུགས་ཁར་སླེབས་པ་ཙམ་ལ་རྟོག་སྒྲ་དང་བཅས་རྡོ་རྗེ་རྣལ་འབྱོར་མ་ནམ་མཁའ་ལ་ཡེད་ཀྱིས་བྱོན། བློས་འཁྱུད་
ཆུད་དུ་བྱོན་པ་དང་དག་པ་མཁའ་སྤྱོད་དུ་ཕེབས་པར་བསམ། རྣལ་འབྱོར་མ་འཇའ་ཡལ་བ་ལྟར་བསམ་ལ་རིག་པ་བརྗོད་མེད་དུ་འཇོག ཌཱ་དྲིལ་རོལ་ཆེན། ཨོཾ་གསུམ་མ། ཡང་ནམ་མཁའ་ལ་སྤྲིན་
རྡོལ་བ་བཞིན་རྡོ་རྗེ་རྣལ་འབྱོར་མ་ལམ་གྱིས་བྱོན། མར་བབས་དཔུང་པའི་སྟེང་དུ་ཞབས་བཞག་པའི་ཐུགས་ཁ་ནས་རང་སེམས་ཨ་ཆ་ལྟེ་བར་སླེབས། ཡང་གསོལ་འདེབས་སོགས་གོང་བཞིན་ཏེ། དྲིལ་བས་ཚར་
གསུམ་མཛད། མཐར་རྡོ་རྗེ་རྣལ་འབྱོར་མ་འོད་དུ་ཞུ་སྤྱི་བོ་ནས་ཐིམ་པས་སྤྱི་བོ་སྲ་ཞིང་མཁྲེགས་པ་རྡོ་རྗེའི་རང་བཞིན་དུ་བསམ། རྗེས་འདྲའོ། །བར་དོའི་དབང་བསྐུར་ལ། སློབ་མ་ཀྱེ་རྡོར་དུ་
བསྐྱེད་པ་ལ་ཡེ་ཤེས་དབབ་པའི་རོལ་ཆེན་ཡན་འདྲ། མདུན་བསྐྱེད་ཀྱེ་རྡོར་ལྷ་དགུ་སློབ་མའི་སྤྱི་བོར་སྤྱན་དྲངས། དབང་གཞི་ལ་དེ་ཝ་པི་ཙུ་དང་ཌཱ་དྲིལ། རྗེས་སུ་བར་དོའི་བྱིན་རླབས་རང་
གི་མདུན་དུ་ཆོས་འབྱུང་སྔོན་པོ་སྤང་རྒྱན་ཁ་འབྱེད་པ་ལྟ་བུའི་ནང་དུ། རང་སེམས་ཧཱུྃ་སྔོན་པོའི་འོད་ཀྱིས་འདས་མ་འོངས་ད་ལྟར་གྱི་མངལ་གྱི་ལན་ཆགས། བག་ཆགས། དྲི་མ་ཐམས་ཅད་སྦྱངས། 
1-31
སྣང་སྲིད་ཐམས་ཅད་དགེས་རྡོར་ཡབ་ཡུམ་དུ་ལམ་མེ་བསལ་བ་ལ་རྨི་ལམ་སྒྱུ་མ་བར་དོའི་དྲན་བདུན་མཐར་འཛིན་མེད་དུ་ཅི་གནས་འཇོག རྗེས་འདྲའོ། །བདེ་མཆོག་ལྷ་ལྔའི་བྱིན་རླབས་ལ། བགེགས་གཏོར་
ནས། ཡེ་ཤེས་དབབ་པའི་བར་སྔོན་འགྲོ་འབྲིང་པོ་བཞིན་ལས་རྒྱུན་བཤགས་རྗེས་སུ་རིགས་ལྔའི་སྡོམ་བཟུང་། དངོས་གཞི་མཁས་བཙུན་པའི་ཡི་གེ་བཞིན་ལ། བུམ་དབང་གི་དབང་གཞི་རྫོགས་པའི་མཐར་ཌཱ་དྲིལ། དབང་
གཞན་གསུམ་ལ་ཌཱ་དྲིལ་ཏེ། འདི་ལ་ཕྱིའི་དབང་རྒྱས་པ་གཅིག་ཡོད་ཚོད་འདུག་ནའང་ཆད། ད་ལྟ་འདི་གཅིག་པུ་ཡིན་གསུངས། རང་སེམས་འཆི་མེད་ཀྱི་བྱིན་རླབས་ལ་ཡེ་ཤེས་དབབ་པ་ཡན་འདྲ། སློབ་
དཔོན་བདེ་མཆོག་ཏུ་གསལ་བའི་གནས་གསུམ་དུ་འབྲུ་གསུམ། ལྟེ་བར་ཧཱུྃ་ཁ་དོག་ལྔ་ལྡན་གསལ་བཏབ། བླ་མ་རིན་པོ་ཆེ་བདག་ལ་དབང་གཞི་རྫོགས་པར་བསྐུར་དུ་གསོལ། ལན་གསུམ། སློབ་དཔོན་གྱི་དཔྲལ་
བའི་ཨོཾ་ལས་འཁོར་ལོ་བདེ་མཆོག་སྐུ་མདོག་དཀར་པོ་སྐུ་ཆུང་ལ་ཡན་ལག་རགས་པ་བདེ་བ་ཆེན་པོའི་གར་ལིང་ལིང་མཛད་པ་དཔག་ཏུ་མེད་པ་བྱོན། རང་གི་སྨིན་མཚམས་ནས་ཞུགས། ལུས་ཐམས་
ཅད་གང་བས་བུམ་པའི་དབང་ཐོབ་སོགས། ཧྲཱི་ཧ་ཧ་ཌཱ་དྲིལ། སྐུ་གསུང་ཐུགས་འགྲེ། སློབ་དཔོན་གྱི་གནས་གསུམ་གྱི་འབྲུ་གསུམ་རྒྱང་གིས་འཆད། ཁྱེད་རང་གི་གནས་གསུམ་དུ་ལམ་མེ་བཞུགས། ཡང་སློབ་དཔོན་གྱི་ལྟེ་བའི་ཧཱུྃ་ལས་འཁོར་ལོ་བདེ་མཆོག་ཁ་དོག་སྣ་ཚོགས་པ་སྐུ་ཆུང་ལ་ཡན་ལག་རགས་པ་བདེ་བ་ཆེན་པོའི་གར་ལིང་ལིང་མཛད་པ་དཔག་ཏུ་མེད་པ་བྱོན། 
1-32
ལུས་ཀྱི་ནང་ཐམས་ཅད་གང་བས་ཚེ་ཐོག་མ་མེད་པ་ནས་བསགས་པའི་སྡིག་སྒྲིབ་ཐམས་ཅད་དག དབང་བཞི་པ་ཐོབ། སྐུ་གསུང་ཐུགས་ཡོན་ཏན་འཕྲིན་ལས་དང་བཅས་པའི་བྱིན་རླབས་མ་ལུས་པ་ཞུགས།
སླར་སློབ་དཔོན་གྱི་ལྟེ་བའི་ཧཱུྃ་ལས་ཧཱུྃ་གཅིག་རྒྱང་གི་འཆད་རང་གི་ལྟེ་བར་ཞུགས། སྤྱི་བོའི་ཨོཾ་ཨཱཿལ་ཨཱཿ ཧཱུྃ་ལ་ཧཱུྃ་ལྟེ་བའི་ཧཱུྃ་ལ་ཐིམ། དེའི་རྐྱེན་གྱི་སྐུ་ལུས་རྡོས་བཅས་རྣམ་སྨིན་
ཤ་ཁྲག་གི་ཕུང་པོས་གཙོ་བྱས་སྣང་ཞིང་སྲིད་པས་བསྡུས་པའི་ཆོས་ཐམས་ཅད་འོད་དུ་ཡ་ལ་ལ་སྟོང་ཉིད་དུ་ཐིམ་པར་བསམ་ལ་ཌཱ་དྲིལ། སྟོང་ཉིད་དེའི་ངང་ལས་འཁོར་ལོ་སྡོམ་པ་འོད་
ཀྱི་རང་བཞིན་སྒྱུ་མ་ལྟ་བུར་ལམ་གྱིས་གྱུར་པར་བསམ། རྗེས་འདྲའོ། །ལམ་འཁྱེར་རྣམ་གསུམ་གྱི་བྱིན་རླབས་ལ། སློབ་མ་བདེ་མཆོག་དུ་བསྐྱེད་པ་ལ་ཡེ་ཤེས་དབབ་པའི་རོལ་ཆེན་ལན་གཅིག་གིས་འཐུས།
དེ་ནས་མཎྜལ། དང་པོ་སྲུང་འཁོར་དུར་ཁྲོད་བཅས་པའི་དབུས་སུ་ཆུད་པའི་གཞལ་ཡས་ཁང་མཚན་ཉིད་ཐམས་ཅད་ཡོངས་སུ་རྫོགས་པའི་དབུས་སུ་པདྨ་འདབ་བཞིའི་ལྟེ་བར་སེང་ཁྲི་པད་ཉི་ལ་བླ་མ་
དང་གཉིས་སུ་མེད་པའི་བདེ་མཆོག་སེར་པོ། ཤར་དུ་དགྱེས་མཛད། ལྷོར་གསང་འདུས། ནུབ་ཏུ་སྒྱུ་མ་ཆེན་པོ། བྱང་དུ་དྲག་པོ་རྡོ་རྗེ་འཇིགས་བྱེད་རྣམས་གསལ་བཏབ། མཎྜལ་དབུལ། དེ་དག་ལ་ལུས་ལོངས་སྤྱོད་ཐམས་ཅད་དང་། 
1-33
སྟོང་གསུམ་ཐམས་ཅད་འཛམ་བུས་གསེར་གྱིས་བཀང་བ་ལྟོས་མེད་དུ་ཕུལ། ཁྱད་པར་མདུན་དུ་ཐོད་པའི་ནང་དུ་རང་ལུས་ལིངས་ཀྱིས་སྐྱུར་བས་འཆི་མེད་ཀྱི་བདུད་རྩིས་ལྟེམས་ཀྱིས་ཞུ་བ་དེ་ཕུལ་བས་
ཐུགས་རྒྱུད་བདེ་ཆེན་གྱིས་ཚིམས་པར། བདག་ལ་དགྱེས་བཞིན་བཞུགས་པ་ལ་མོས་གུས་བྱས་པས་དཀྱིལ་འཁོར་ལས་དེ་འདྲ་བ་འཆད་རང་གི་སྨིན་མཚམས་ཀྱི་ཐད་ཙམ་གྱི་ནམ་མཁར་བཞུགས་པ་དེའི་ཐུགས་ཁ་
ནས་འོད་འཕྲོས་སྐྱབས་གནས་ཐམས་ཅད་ཀྱི་བྱིན་རླབས་འོད་ཀྱི་རྣམ་པར་བསྡུས་ནས་བླ་མ་དང་དབྱེར་མེད་པའི་ལྷ་ལྔ་ལ་ཐིམ། བླ་མ་རིན་པོ་ཆེར་བདག་ལ་བུམ་པའི་དབང་བསྐུར་དུ་གསོལ། སྐུའི་
བྱིན་རླབས་དབབ་དུ་གསོལ། ཞེས་གསོལ་བ་བཏབ་པས་དེ་དག་གི་སྐུའི་ཆ་ཤས་ཐམས་ཅད་དང་གདན་ལས་འོད་ཟེར་དཀར་གྱི་ཁུ་བ་ལྟ་བུ་ཆི་ལི་ལི་བབས། རང་གི་སྨིན་མཚམས་ཡན་ཆད་གང་།
བུམ་པའི་དབང་ཐོབ་སོགས། རྒྱུད་སྡེ་གཙོ་བོ་ལྔ་ཡུམ་བཅས་ཀྱི་སྔགས་དང་། རྩ་བརྒྱུད་ཀྱི་བླ་མ་རྣམས་ཀྱི་སོགས་དང་། ཌཱ་དྲིལ། བྱིན་རླབས་བསྡུས། གསོལ་གདབ། མགྲིན། ཐུགས་ཀྱི་འོད་ཀྱིས་དབང་གཉིས། རྟེན་དང་
བརྟེན་པ་ཕྱི་ནས་རིམ་བཞིན་འོད་དུ་ཞུ། བླ་མ་ལ་ཐིམ། བླ་མ་དང་གཙོ་བོ་དབྱེར་མེད་རང་ལ་ཐིམ། འོད་དུ་ཡལ་ནས་སྟོང་ཉིད་ཀྱི་ངང་དུ་རིག་པ་བརྗོད་མེད་དུ་འཇོག དབང་རེ་རེ་ལ་སྔགས་རོལ་འདྲའོ། །
1-34
དེ་ནས་མཎྜལ་གཉིས་པ་བདེ་མཆོག་ལྷ་ལྔར་གསལ་བཏབ། མཎྜལ་ནས་བདུད་རྩིའི་བར་ཕུལ། བླ་མ་རིན་པོ་ཆེ་བདག་ལ་དབང་བཞི་རྫོགས་པར་སྐུར་དུ་གསོལ། ལན་གསུམ། བླ་མའི་དཔྲལ་བ་ནས་འཁོར་ལོ་
བདེ་མཆོག་གི་སྐུའི་ངོ་བོར་གྱུར་པའི་བདེ་མཆོག་དཀར་པོ་སྐུ་ཆུང་ལ་ཡན་ལག་རགས་པ་སྔགས་ཀྱི་སྒྲ་བསྒྲོག་པ། བུང་བ་ཚང་ནས་རྡོལ་བ་བཞིན་དུ་སྐྱ་ཆེམ་ཆེམ་འཕྲོས། རང་གི་སྨིན་མཚམས་
ནས་ཞུགས། ལུས་ཐམས་ཅད་ཁེངས། བུམ་པའི་དབང་ཐོབ་སོགས། མགྲིན་པ་ནས་དམར། སྙིང་ཁ་ནས་སྔོ། སླར་གནས་གསུམ་ཆར་ནས་དཀར་དམར་མཐིང་གསུམ་ཁྲ་ཆེམ་ཆེམ་འཕྲོས། སློབ་མའི་གནས་གསུམ་དུ་ཐིམ་པས་དབང་
བཞི་པ་སོགས། དབང་རེ་རེ་ལ་ཧྲཱི་ཧ་ཧ། སོགས་དང་ཌཱ་དྲིལ་སོགས་མཎྜལ་གསུམ་པའི་བདེ་མཆོག་ལྷ་ལྔར་གསལ་བ་ལ་མཎྜལ་ནས་གསོལ་གདབ་ཀྱི་བར་སྔ་མ་བཞིན། སློབ་མ་འཁོར་ལོ་སྡོམ་པ་
འོད་ཀྱི་རང་བཞིན་དུ་གསལ་བའི་ལུས་ཀྱི་དབུས་དྲང་པོར་རྩ་དབུ་མ་ཁ་དོག་དཀར་གསལ་འོད་ཀྱི་རང་བཞིན་རྩ་བ་ཕྲ་བ་ལྟེ་བར་ཟུག་པའི་ནང་དུ་རཾ་དམར་པོ། རྒྱ་གླིང་གི་ཤམ་
ཁ་ལྟར་ཇེ་སྦོམ་དུ་སོང་བ་ཚངས་པའི་བུ་གར་ཧར་རེ་ཡོད་པ་གསལ་བཏབ། མདུན་བསྐྱེད་ལ་དེ་འདྲ་བ་ཚངས་བུག་གི་སྟེང་གི་ནམ་མཁར་བྱོན། སྐུ་ལུས་ཐམས་ཅད་ལས་བདུད་རྩི་ཤེལ་དཀར་བཞུ་བའི་ཁུ་བ་ལྟ་བུ་བབས། 
1-35
ཚངས་བུབ་ནས་ཞུགས་སྨིན་མཚམས་ཡན་ཆད་གང་བས་བུམ་དབང་། མདུན་བསྐྱེད་ཀྱི་མགྲིན་པ་ནས་འོད་དཀར་དམར་ཉི་ཟླ་འདྲེས་པ་ལྟར་དུ་འཕྲོས། མགྲིན་པ་ནས་ཞུགས་ལུས་ཐམས་ཅད་ཁེངས་པས་གསང་དབང་། མདུན་
བསྐྱེད་ཀྱི་ཡུམ་ལས་ཡུམ་དུ་ཆར། རང་གི་ཡུམ་རྡོ་རྗེ་ཕག་མོ་ལ་ཐིམ། སྙོམས་པར་ཞུགས་པས་དགའ་བཞིའི་ཡེ་ཤེས་སྐྱེས་པ་གསུམ་པ། མདུན་བསྐྱེད་འོད་དུ་ཞུ། སྤྱི་བོ་ནས་ཐིམ་པས། རང་ལྷར་
གསལ་བ་ལ་ཐིམ་པས་ཇེ་དེངས་ཇེ་དེངས་ནམ་མཁའ་ལ་འཇའ་ཡལ་བ་ལྟར་བསམ་བརྗོད་མེད་དུ་འཇོག་པ་བཞི་པ། དབང་རེ་རེ་ལ་ཧྲཱིཿ ཧ་ཧ་སོགས་དང་ཌཱ་དྲིལ་སོགས། འཇུག་གསུམ་ཀ་ལ་
ཐུན་མོང་དུ་དེངས་ནས་སོགས་མཛད། སུ་ཁ་ཆོས་དྲུག་གི་བྱིན་རླབས། མཎྜལ་དབུས་དཀར་དམར། ཤར་སྔོ། ལྷོ་སེར། ནུབ་དམར། བྱང་ལྗང་བའི་འདབ་མ་བཞི། ཚོམ་བུ་དཀར་དམར་གཅིག་འགོད། བདག་མདུན་དུ་འདི་
ནས་མཁའ་འགྲོ་མ་སུ་ཁ་སྐུ་མདོག་དུང་ལྟར་དཀར་བ། དབུ་སྐྲ་བསིལ་བུར་འཕྱང་ཤིང་། རུས་པའི་རྒྱན་གྱིས་བརྒྱན་པ། ཕྱག་གཡས་པ་ཐོད་པ་བདུད་རྩིས་གང་བ། གཡོན་སྐྱེ་མེད་མཚོན་པའི་ཕྱག་རྒྱ་
ཆེད་དུ་འཕྱར་ཙམ་མཛད་པ། ཞབས་གཉིས་གར་སྟབས་ཀྱི་རྣམ་པ། ཡེ་ཤེས་ཀྱི་སྐུ་ཅན་ཞིག་བསམ། ཁམ་རང་ལ་མཛད། མཆོད་བསྟོད་མདོར་བསྡུས་བྱ། མཎྜལ་ནས་སློབ་མ་སུ་ཁར་བསྐྱེད་པ་ལ་ཡེ་ཤེས་དབབ་པའི་བར་གྱི་སྔོན་འགྲོ་འདྲ། 
1-36
དངོས་གཞི་ལ། མཎྜལ་བསྲུངས་འཁོར་དུར་ཁྲོད་དང་བཅས་པའི་དབུས་སུ་ཆུད་པའི་གཞལ་ཡས་ཁང་མཚན་ཉིད་རྫོགས་པའི་དབུས་ན་བཞུགས་པའི་སུ་ཁ་གསལ་བཏབ། མཎྜལ་ཕུལ། གང་གི་དྲིན་སོགས་ཤོ་ལོ་ཀ་གཅིག་
གི་མཐར། བདག་ལ་དབང་བཞི་བསྐུར་དུ་གསོལ། བརྒྱ་པ་ལན་གསུམ། མདུན་བསྐྱེད་པའི་གནས་གསུམ་དུ་འབྲུ་གསུམ་གསལ་བཏབ། དཔྲལ་བའི་ཨོཾ་ལས་འོད་དཀར་པོ་བྱུང་། རང་གི་སྨིན་མཚམས་ནས་ཞུགས། བུམ་པའི་དབང་
ཐོབ་སོགས། མགྲིན། སྙིང་། གནས་གསུམ་ཆར་གྱི་སྤྲོ་བསྡུས་དབང་བཞི་རིམ་བཞིན་བསྐུར། རེ་རེ་ལ་སྔགས་དང་བཅས་པའི་ཌཱ་དྲིལ་རེ། མཐར་སློབ་མ་ལུས་གནད་བཅས་མིག་མདུན་གྱི་བར་སྣང་སྟོང་ལ་ཧེར་གཏད།
མདུན་བསྐྱེད་ཀྱི་ཕྱག་གཡོན་སྐྱེ་མེད་མཚོན་པའི་ཕྱག་རྒྱ་ཆེད་དུ་ཕྱར་ཙམ་མཛད་དེ། ནམ་མཁའ་རིག་མེད་སྟོང་པ་ལ། །རིག་བཅས་སེམས་ཀྱི་རྩ་བ་བཅུན། །རྩ་བ་བཅུན་ལ་ལྷུག་པར་ཞོག །ཅེས་ལན་
གསུམ་གསུང་བར་བསམ་ལ། དེའི་དོན། ནམ་མཁའ་དང་རང་སེམས་དབྱེར་མེད་དུ་བསྲེས་ནས་བརྗོད་མེད་དུ་བཞག་པའི་ཚེ་ནི། ནམ་མཁའ་ལ་སྐྱེ་འཇིག་མེད་པ་བཞིན་དུ་རང་སེམས་ལ་སྐྱེ་འཇིག་མེད། ནམ་
མཁའ་ལ་མཐའ་དབུས། ངོས་བཟུང་ཅི་ཡང་མེད་པ་བཞིན་དུ་རང་སེམས་ཀྱང་དེ་ལྟར་ཤེས་པར་བྱས་ལ་དེ་ཁའི་ངང་དུ་འཛིན་པ་མི་བྱ། བཅས་བཅོས་མི་བྱ་བར་རང་བབས་སུ་ཞོག་ཅེས་བརྗོད། 
1-37
རྗེས་འདྲའོ། །འདི་ལ་ངེས་པར་ཚོགས་འཁོར་ཅིག་མཛད་དོ། །མཁའ་སྤྱོད་དཀར་མོའི་བྱིན་རླབས། ཡེ་ཤེས་དབབ་པ་ཡན་འདྲ། མདུན་བསྐྱེད་བླ་མ་ངོ་བོ་གཅིག་ལ་རྣམ་པ་ཐ་དད་པའི་མཁའ་སྤྱོད་དཀར་མོ་
མངོན་རྟོགས་བརྗོད་དེ་ནམ་མཁའ་ལ་བྱ་ལྡིང་བ་ལྟར་ལིང་ལིང་བཞུགས་པ་ལ་མཎྜལ། བླ་མ་རིན་པོ་ཆེ་བདག་ལ་དབང་བཞི་རྫོགས་པར་བསྐུར་དུ་གསོལ། ། གསུམ་པ། བླ་མ་དང་མདུན་བསྐྱེད་ཀྱི་དཔྲལ་
བའི་ཨོཾ་ལས་འོད་ཟེར་འཕྲོས། ཕྱོགས་བཅུའི་བླ་མ་ཡི་དམ་སངས་རྒྱས་བྱང་སེམས་དཔའ་བོ་དང་རྣལ་འབྱོར་མ་ཐམས་ཅད་ཀྱི་སྐུའི་བྱིན་རླབས་ཐམས་ཅད་སྤྱན་དྲངས། དཔྲལ་བའི་ཨོཾ་ལ་ཐིམ། དེ་ལས་སྐུའི་
ངོ་བོར་གྱུར་པའི་འོད་ཟེར་དཀར་པོ་དཔག་དུ་མེད་པ་བྱུང་། སློབ་མའི་དཔྲལ་བ་ནས་ཞུགས། བུམ་པའི་དབང་ཐོབ་སོགས། མགྲིན་ཐུགས་ཀྱིས་གསང་ཤེས་གནས་གསུམ་བཅར་གྱི་སྤྲོ་བསྡུས་བཞི་པ། རེ་རེ་ལ་
ཌཱ་དྲིལ་དང་ཨོཾ་གསུམ་མ་བརྒྱུད་པའི་བྱིན་དབབ་དང་བཅས་པ། །
༄། །གཏོར་མས་བྱིན་རླབས།
གཏོར་མས་བྱིན་རླབས་ནི། གཏོར་མ་མཁའ་སྤྱོད་མ་དཀར་མོ་གསལ་བ་དེ་ཉིད་ནམ་མཁའ་ལ་བྱ་འཕུར་བ་བཞིན་ཡེར་གྱིས་རང་རང་
གི་སྤྱི་བོ་ནས་སིབ་ཀྱིས་ཐིམ་པར་བསམ་ལ། ཨོཾ་གསུམ་མའི་ཞབས་སུ་ཛཿཧཱུྃ་བཾ་ཧོཿ བརྗོད་ཅིང་སྤྱི་བོར་བཞག རྗེས་འདྲ། མཁའ་སྤྱོད་དམར་མོའི་དབང་ནི་འཕོ་བའི་དབང་དེ་ཁ་ཡིན་པས་སྤྲོས་པ་ལ་དགའ་ན་ལྡབས་ལ་བྱ། 
1-38
བསྡུ་ན་མི་དགོས་གསུང་། མཁའ་སྤྱོད་གསུམ་ཕྲུགས་ལ་མཎྜལ་ཟླུམ་སྐོར་མུ་ཁྱུད་སྔོན་པོ་བཞི་ལྗང་བའི་དབུས་སུ་འཇའ་སྐོར་ནོར་བུ་མིག་གསུམ་ལྟ་བུ་ལ་ཚོམ་བུ་རེ་རེ་འགོད། ཡེ་ཤེས་དབབ་པའི་
རོལ་ཆེན་ཡན་འདྲ། མདུན་གྱི་མཎྜལ་ཡེ་ཤེས་ཀྱི་སྣང་བ་ལས་གྲུབ་པའི་འཇའ་འོད་ལྔའི་ཟླུམ་སྐོར་ནོར་བུ་མིག་གསུམ་པ་ལྟ་བུའི་གཡས་ཀྱི་ཟླུམ་སྐོར་དུ་བླ་མ་འཁོར་ལོ་བདེ་མཆོག་གསེར་བཙོ་
མ་ལྟ་བུ། དབུས་ཀྱི་ཟླུམ་སྐོར་དུ་མཁའ་སྤྱོད་མ་དཀར་མོ། གཡོན་གྱི་ཟླུམ་སྐོར་དུ་ཡེ་ཤེས་མགོན་པོ་རྣམས་མངོན་སུམ་བཞིན་བཞུགས་པ་དེ་དང་། བླ་མ་རྣམ་པ་ཐ་དད་ལ་ངོ་བོ་ཐ་
མི་དད་པ། དེ་དག་གི་མཐའ་བསྐོར་དང་། སྟེང་གི་ནམ་མཁའ་ལ་རྩ་བརྒྱུད་ཀྱི་བླ་མ་ཡི་དམ་སངས་རྒྱས་བྱང་སེམས་སྤྲིན་ཕུང་འཐིབས་པ་བཞིན་བཞུགས་པ་ལ། མཎྜལ་གསོལ་བཏབ་གོང་བཞིན། བླ་མ་
འཁོར་ལོ་སྡོམ་པར་གསལ་བའི་དཔྲལ་བར་སྐུའི་མཁའ་སྤྱོད་མ་དཀར་མོ། མགྲིན་པར་གསུང་གི་མཁའ་སྤྱོད་མ་དམར་མོ། ཐུགས་ཁར་ཐུགས་ཀྱི་མཁའ་སྤྱོད་མ་མཐིང་ཀ་བསམ་པའི་དཔྲལ་བའི་མཁའ་སྤྱོད་མའི་གསང་
གནས་ནས་འོད་ཟེར་དཀར་པོ་ནམ་མཁའི་ཁམས་གང་བར་འཕྲོས། དེ་དག་ཕྱི་ནང་གསང་བའི་མཆོད་པ་བསམ་གྱིས་མི་ཁྱབ་པར་གྱུར་ཏེ་སངས་རྒྱས་བྱང་སེམས་དེ་དག་ལ་ཕུལ་བས། བཟང་ལན་གྱི་ཚུལ་དུ། 
1-39
སྐུའི་བྱིན་རླབས་ནུས་མཐུ་ཐམས་ཅད་འོད་ཟེར་དཀར་པོའི་རྣམ་པར་བྱུང་། བླ་མའི་དབུ་གཙུག་ནས་ཞུགས་སྐུའི་ནང་ཐམས་ཅད་ཁེངས་པས་བདག་གི་ལུས་ཀྱི་སྒོ་ནས་བླ་མ་ལ་བརྙས་པ། ཐུགས་འཁྲུགས་པའི་
རྒྱུ་བྱས་པ་སོགས་ལུས་ཀྱི་དམ་ཚིག་ཉམས་པ་ཐམས་ཅད་མིང་ཙམ་ཡང་མེད་པར་སངས་ཀྱི་དག སྐུའི་དམ་ཚིག་ཉམས་ཆག་ཐམས་ཅད་བསྐངས། བླ་མ་སྐུ་རྡོ་རྗེའི་ངོ་བོར་གྱུར། མཁའ་སྤྱོད་མའི་གསང་
གནས་ནས་འོད་ཟེར་དཀར་པོ་བྱུང་། སློབ་མའི་དཔྲལ་བ་ནས་ཞུགས། བུམ་པའི་དབང་ཐོབ་སོགས། མགྲིན་པ། སྙིང་ཁ་དང་། གསུམ་ཀ་ནས་སྤྲོ་བསྡུ་གོང་བཞིན་བྱས་པའི་དབང་བཞི་རེ་རེ་ལ་ཌཱ་དྲིལ། ཨོཾ་
གསུམ་མ་ན་མོ་བུདྷ་ཡའི་གསོལ་འདེབས་དང་བཅས་པ་རེ། དེ་བླ་མ་ལ་རྟེན་པའི་དབང་བཞི་ཡིན། ཡི་དམ་གྱི་དབང་བཞིའི་སླད་དུ། མདུན་གྱི་མཁའ་སྤྱོད་མ་དཀར་མོ་ལ་མོས་གུས་བྱས་དབང་
བཞི་བསྐུར་དུ་གསོལ་སྙམ་པ་བྱས་པས། དེའི་གནས་གསུམ་ནས་འོད་ཟེར་དཔག་ཏུ་མེད་པ་འཕྲོས། དེ་དག་ཕྱི་ནང་གསང་བའི་མཆོད་པར་གྱུར་ནས་བླ་མ་ཡི་དམ་སངས་རྒྱས་བྱང་སེམས་ཐམས་ཅད་ལ་
ཕུལ། དེ་དག་གི་སྐུ་གསུང་ཐུགས་ཀྱི་བྱིན་རླབས་དང་དངོས་གྲུབ་ཐམས་ཅད་བསྡུས་གནས་གསུམ་ནས་ཐིམ། དེའི་གསང་གནས་ནས་འོད་དཀར་དམར་མཐིང་གསུམ་ནམ་མཁའི་ཁམས་གང་བར་བྱུང་། དཀར་པོ་དཔྲལ་བ། དམར་པོ་མགྲིན་པ། 
1-40
སྔོན་པོ་སྙིང་ཁ་ནས་ཞུགས། ལུས་ངག་ཡིད་གསུམ་གྱི་དྲི་མ་དག སྐུ་གསུང་ཐུགས་ཀྱི་བྱིན་རླབས་ཞུགས། དབང་བཞི་ཅིག་ཆར་དུ་ཐོབ་པར་བསམ་ལ་ཌཱ་དྲིལ་དང་སྔགས་ཚར་གཅིག ཆོས་སྐྱོང་གི་དབང་
བཞིའི་སླད་དུ་གཡོན་ན་བཞུགས་པའི་གནས་གསུམ་དུ་ཨོཾ་ཨཱ་ཧཱུྃ་བཀོད་ལ། དབང་བཞི་བསྐུར་དུ་གསོལ་སྙམ་པ་བྱས་པས། གནས་གསུམ་ནས་འོད་ཟེར་སྤྲོ་བསྡུ་སྔར་བཞིན་བྱས། མགོན་པོའི་གནས་གསུམ་ནས་འོད་
དཀར་དམར་མཐིང་གསུམ་ནམ་མཁའ་གང་བ་བྱུང་སོགས། ཌཱ་དྲིལ་སྔགས་བཅས་ཚར་གཅིག རྗེས་འདྲའོ། །བདེ་མཆོག་གསང་སྒྲུབ་ཀྱི་དབང་ལ་མཎྜལ་མུ་ཁྱུད་སྔོན་པོ་པདྨ་འདབ་བཞི། ཤར་དཀར། ལྷོ་སེར། ནུབ་དམར། བྱང་
ལྗང་། ལྟེ་བ་སྔོ་ཚོམ་བུ་གཅིག ཡེ་ཤེས་དབབ་པ་ཡན་འདྲ། མདུན་བསྐྱེད་བླ་མ་རྣམ་པ་ཐ་དད་ལ་ངོ་བོ་ཐ་མི་དད་པའི་འཁོར་ལོ་བདེ་མཆོག་དུ་གསལ་བའི་གནས་གསུམ་ན་སྐུ་གསུང་
ཐུགས་ཀྱི་བདེ་མཆོག་ལྷ་ལྔ་མངོན་སུམ་བཞིན་བཞུགས་པ་ལ་མཎྜལ་གསོལ་གདབ་གོང་བཞིན། སློབ་མ་བདེ་མཆོག་ཏུ་གསལ་བའི་སྤྱི་བོར་བྷྲུཾ་ལས། འཁོར་ལོ་དཀར་པོ་རྩིབས་བཞི་པ་རྩིབས་ཀྱི་རྩེ་ལ་རཾ་
དམར་པོ་རླུང་གི་སྐྱོད་བཞིན་ལ། ལྟེ་བར་ཟླ་ཉི་འཇིགས་བྱེད་དུས་མཚན་གྱི་གདན་དང་བཅས་པ། མགྲིན་པ་དང་སྙིང་ཁར་ཡང་བྷྲཱུཾ་ལས་བྱུང་བའི་འཁོར་ལོ་དམར་སྔོ། གཞན་གོང་བཞིན་བསམ། བླ་མའི་སྤྱི་བོའི་བདེ་མཆོག་ལ་མོས་གུས་བྱས་པས། 
1-41
དེ་ལས་སྐུའི་བདེ་མཆོག་གི་ངོ་བོར་གྱུར་པའི་ཧཱུྃ་དཀར་པོ་དང་བཾ་དམར་པོ་འཆད། སློབ་མའི་སྤྱི་བོའི་འཁོར་ལོའི་ལྟེ་བར་བྱོན་པས་སྐུའི་བདེ་མཆོག་ཡབ་དཀར། ཡུམ་དམར། མཚན་ཉིད་ཐམས་ཅད་ཡོངས་
སུ་རྫོགས་པ་སྙིང་པོའི་རྣལ་འབྱོར་མ་བཞི་ཀའང་དཀར་མོར་གསལ་བཏབ། རླུང་གིས་སྐྱོད་པའི་རཾ་ལས་མེ་འོད་བྱུང་བ་ཕྱི་ནང་གསང་བའི་མཆོད་པར་གྱུར་ཏེ་ཕུལ་བས། དེ་དག་སྐུ་ལས་འོད་ཟེར་
འཕྲོས་པས། སྐྱབས་ཡུལ་ཐམས་ཅད་ཀྱི་སྐུའི་བྱིན་རླབས་བསྡུས་ལུས་ཐམས་ཅད་གང་། སྐུ་ལ་ཐིམ་པས་རྐྱེན་བྱས། ཡབ་ཡུམ་སྙོམས་པར་ཞུགས། རྣལ་འབྱོར་མ་བཞི་ཀའང་ཡབ་ཀྱི་ངོ་བོ་ཁཱ་ཊྭཱཾ་ཀ་སྦྱར་བས།
སྦྱོར་མཚམས་ནས་བདུད་རྩིའི་རྒྱུན་དཀར་པོ་བྱུང་། བུམ་པའི་དབང་ཐོབ་སོགས། ཧྲཱིཿཧ་ཧ་དང་ཌཱ་དྲིལ་མགྲིན་ཐུགས་དང་། ཡང་སློབ་མའི་གནས་གསུམ་ན་བཞུགས་པའི་བདེ་མཆོག་ལྷ་ལྔའི་སྦྱོར་མཚམས་ནས་བདུད་རྩི་དཀར་
དམར་མཐིང་གསུམ་བྱུང་ལུས་ཐམས་ཅད་ཁེངས། མཐར་སྤྱི་བོའི་ལྷ་ལྔ་མགྲིན་པ་ལ་ཐིམ། དེ་སྙིང་ཁ་ལ་ཐིམ། གདན་འཁོར་ལོ་འཁོར་བཞི་ལ་ཐིམ། དེ་ཡུམ་ཡབ་ལ་ཐིམ། དེ་ཇེ་ཕྲ་ཇེ་ཆུང་ནམ་
མཁའ་ལ་འཇའ་ཡལ་བ་ལྟར་བསམ་ལ་ཌཱ་དྲིལ། རྗེས་འདྲ། ཕྱག་རྡོར་གསང་སྒྲུབ་ཀྱི་བྱིན་གྱིས་བརླབས་པ་ལ། མཎྜལ་གོང་དང་འདྲ། སློབ་མ་ཕྱག་རྡོར་དུ་སྐྱེད་པ་ལ་ཡེ་ཤེས་དབབ་པ་ཡན་འདྲ། 
1-42
བླ་མ་དང་མདུན་བསྐྱེད་རྣམ་པ་ཐ་དད་ལ་ངོ་བོ་ཐ་མི་དད་པའི་ཕྱག་རྡོར་དུ་གསལ་བ་ལ་མཎྜལ་གསོལ་གདབ་གོང་བཞིན། བླ་མའི་དཔྲལ་བ་ནས་འོད་ཟེར་དཀར་པོ་འཕྲོས། ཕྱོགས་བཅུའི་བླ་
མ་ཡི་དམ་སངས་རྒྱས་བྱང་སེམས་ཐམས་ཅད་ཀྱི་སྐུའི་བྱིན་རླབས་དང་ནུས་མཐུ་ཐམས་ཅད་འོད་དཀར་པོའི་རྣམ་པར་སྤྱན་དྲངས། དཔྲལ་བའི་ཨོཾ་ལ་ཐིམ། དེ་ལས་སྐུའི་ངོ་བོར་གྱུར་པའི་འོད་ཟེར་དཀར་
པོ་དཔག་དུ་མེད་པ་བྱུང་། སློབ་མའི་དཔྲལ་བ་ནས་བཞུགས། བུམ་པའི་དབང་ཐོབ་སོགས། ཌཱ་དྲིལ་དང་ཨོཾ་བཛྲ་ཧ་ལི་ཛ་ལི་ཧ་ན་སརྦ་དུཥྚཾ་ཧཱུྃ་ཕཊ་ཨ་བེ་ཤ་ཡ་ཛཿཧཱུྃྃ་བཾ་ཧོཿ ཞེས་
བརྗོད། མགྲིན། ཐུགས། གསུམ་ཀའི་སྤྲོ་བསྡུས་དབང་བཞི་རེ་རེ་ལ་ཌཱ་དྲིལ་དང་སྔགས་འདྲ། དེ་ལྟར་དབང་བཞི་སྐུར་བ་ལ་རྟེན་ནས་ཁྱེད་རང་རྣམ་པའི་སྒོ་གསུམ་གྱི་དྲི་མ་ཐམས་ཅད་དག་པས་སྐད་
ཅིག་གིས་པདྨ་དང་ཟླ་བ་བགེགས་ཀྱི་རྒྱལ་པོ་ཨ་པ་ར་ཙི་ཏའི་གདན་ལ་བཞུགས་པའི་དཔལ་ཕྱག་ན་རྡོ་རྗེ་སྐུ་མདོག་སྔོན་པོ་ཞལ་གཅིག་ཕྱག་བཞི་པ་ཕྱག་གཡས་དང་པོ་རྡོ་རྗེ་རྩེ་
ལྔ་པ་འཕྱར་ཞིང་། གཡོན་དང་པོ་སྡིགས་མཛུབ་སྒྲེང་བ། འོག་མ་གཉིས་འབར་བའི་ཕྱག་རྒྱ་མཛད་པ། ཡེ་ཤེས་ཀྱི་མེ་འབར་བའི་དབུས་ན་བཞུགས་པར་ལམ་གྱི་སྒོམ་པ་ནི་ལྷ་དངོས་ཀྱིས་རྗེས་སུ་གནང་བའོ། །
1-43
སློབ་མའི་སྙིང་ཁའི་ཟླ་བ་ལ་ཧཱུྃ། སློབ་དཔོན་གྱི་ཐུགས་ཁའི་ཧཱུྃ་ལས་ཧཱུྃ་ཡིག་གཉིས་པ་སོགས་སྔགས་ཀྱི་རྗེས་བཟློས་ལན་གསུམ། བཅོམ་ལྡན་བདག་ལ་དང་། འདི་ལ་སོགས། རྗེས་འདྲ་རྣམ་འཇོམས་གསང་སྒྲུབ་
ཀྱི་བྱིན་རླབས་ལ། མཎྜལ་གོང་བཞིན་གྱི་སྟེང་དུ་བུམ་པ་བཤམས། བགེགས་གཏོར་ནས། དབང་བཞིའི་བར་ལྷ་སྔགས་རྗེ་བ་མ་རྟོགས་ཕྱག་རྡོར་བཞིན། །
༄། །ཁྲུས་ཀྱི་བྱིན་རླབས།
ཁྲུས་ཀྱི་བྱིན་རླབས་པ་ནི། བུམ་པའི་ནང་གི་ལྷའི་སྐུ་
ལུས་ཐམས་ཅད་ལས་སྔགས་ཕྲེང་རང་སྒྲ་སྒྲོག་པ་དཔག་ཏུ་མེད་པ་འུ་རུ་རུ་འཕྲོས་བུམ་པའི་ཆུ་དང་དབྱེར་མེད་དུ་གྱུར། མཐར་ལྷ་ཡང་འོད་དུ་ཞུ་ནས་བུམ་ཆུ་དང་དབྱེར་མེད་པ་དེས་
ལུས་ཐམས་ཅད་བཀྲུས་པས་མི་མཐུན་པའི་ཕྱོགས་ཐམས་ཅད་སངས་ཀྱིས་དག་པའི་མོས་པ་མཛོད། ཅེས་ཡང་སྙིང་བརྗོད་ཅིང་བཀྲུ། མཐར་ཧུབ་རེ་འཐུང་དུ་བཞུགས། འདི་ལ་འཇག་པ་ལུང་ཙམ་ལ་རྟེན། བྱིན་རླབས་
འདི་བསམ་པ་གཏིང་པ་ནས་བརྒྱུད་པ་ཡིན་གསུང་། རྡོ་རྗེ་རྣམ་འཇོམས་སྐུ་མདོག་མཐིང་ཁ་གཡས་རྡོ་རྗེ་འཕྱར་ཞིང་། གཡོན་དྲིལ་བུ་སྐུར་རྟེན་པ་ཞབས་གཡས་བསྐུམ་གཡོན་བརྐྱང་གིས་དོར་སྟབས་ཀྱི་བཞུགས་པའོ།། །།
རྡོ་རྗེ་རྣམ་པར་འཇོམས་པ།།

